تغذيات RSS

إصدارات جديدة
إصدار صوتي
أمسية حائل للشاعر ناصر القحطاني

أمسية حائل للشاعر ناصر القحطاني
التفاصيل
ديوان أمسية حائل لشاعر الأندلس الشاعر / ناصر القحطاني

لتحميل أكواد ديوان أمسية حائل لشاعر الأندلس الشاعر / ناصر القحطاني أرسل الرمز 781 إلى 88550 مجاناً.


لتحميل القصيدة أرسل رقم الكود إلى 88550

قصيدة الحدود رقم الكود 40982
قصيدة ابن باز رقم الكود 40983
قصيدة أحمد ياسين رقم الكود 40984
قصيدة غازي رقم الكود 40985
قصيدة النسا رقم الكود 40986
قصيدة الغربة رقم الكود 40987
قصيدة فضفضت لي رقم الكود 40988
قصيدة رسالة إلى الجيل القادم رقم الكود 40989
قصيدة سوار الذهب رقم الكود 40990
قصيدة العروس رقم الكود 40991
قصيدة شمر رقم الكود 40992
قصيدة إرهابي رقم الكود 40993
قصيدة أهل الأذكار رقم الكود 40994
قصيدة بغداد رقم الكود 40995
قصيدة يمه رقم الكود 40996
قصيدة جبل طارق رقم الكود 40997
قصيدة قصر الحمرا رقم الكود 40998
قصيدة همس الغمام رقم الكود 40999
لتحميل القصيدة أرسل رقم الكود إلى 88550

قصائد الإصدار


الحدود

مع كل نسمة يا وطنا تحيه
والله نحبك حب مافيه قده
ياتاجنا اللي روسنا به قويه
يا نبضنا اللي دمنا دون حده
نستاهلك نور ملا العين ضيه
ونبنيك صرح ما انخلق من يهده
لو عنك نحتنا الليالي نحيه
جيناك كل زود شوقه يحده
كلك دفا ياحضن نجد العذيه
هي بس نجد اللي تزف الموده؟
شف ثغر حايل شف هوى ابها البهيه
شف غرة الدمام شف كف جده
شف بيرقك والبرق السامريه
مجد يلوح ولوحة مستجده
شف حكمة الراعي وصدق الرعية
والخير مقبل والضغاين مصده
بحبوبة من سلسبيلك هنيه
يفرق بها التاريخ هزله و جده
يكفيك بيت الله ومنزل نبيه
وشرع من كتاب الولي تستمده
اطعمك من جوع امعبود البريه
و آمنك من خوف وفجيعه وشده
النفط من قبله يدينا ثريه
ومن نشد التاريخ يقنع برده
حنا الوفا حنا الكرم والحميه
حنا هل التوحيد صدق ٍ نعده
قربك وبعدك ياوطنا قضيه
وانا من اللي قصروا فيك مده
مناخك الحافي ورمضاك فيه
واقسى تضاريسك فراش ومخده
ياكم نشدت ورد ظني عليه
عود يمال الجنه اذكر مرده
كان يحكي لي عن زمانه وغيه
ويقول قلبك يا ابيض القلب لده
أيامكم يابوك خضر نديه
ما عشتوا ايام الشقا و المكده
كنا نمر الصايبه و الخطيه
نزايع ما بين روحه ورده
كنا إلى من دارت الشاذليه
كل يدور شرب فنجال ضده
كنا نسوق الروح يم المنيه
لاجل الرغيف اللي ضرينا بمده
واللي خذينا الصبح يوخذ عشيه
ولا نمسى إلا عقب ما نسترده
نسمع من الهودج صياح الصبيه
ام الجديل اللي لها من يكده
تنتخي ونخوتها شبب كل هيه
وتمني الصنديد باللي يوده
لا نشف رمح ولا استراحت مطيه
ولا تركنا سهلةٍ مجرهده
واليوم امان وشمس عز جليه
والدار بين المبغضه و الموده
بقى يوصيني عليها وصيه
لين جرحتني دمعته فوق خده
قلت اذكر الله والحدود محميه
ورث الفطين اللي حفظ ورث جده
حنا لها ما دامت الروس حيه
حنا لها لو بيح الموت سده
أي والله طوال اليدين معصيه
واقصر يد اللي تهقويه يده
لعل ما لي غير داري هويه
الورده اللي بالحشا مستبده
من يوم انا طفل عظامه طريه
وانا ارخي الحلم الطفولي و اشده
صغير الوّح بالعلم في يديه
حتى نشيد بلادي امشي و ارده
والى لمحت البدله العسكريه
اقبض يدي وارفع بهامي وامده
واليوم اغني للوطن سامريه
والروح تارك علمها دون حده




***************
(إبن باز)


الموادَع به من الحنظل و لون الشامه
و ارتحالات الزفير و ذاريات الكنّه
و الليالي كسب و آخرة المكاسب خامه
و البنادم بين ضحك و بين دمع و ونّه
كيف نبكي لا فقدنا شيخنا العلاّمه
كيف نزعل و الصواب اللي فجعنا سنّه
الكفيف المبصر الشامخ قصير القامه
بشّروا به سندس الفردوس و أهل الجنّه
عالمٍ يا كثر ما أبحر لأمته و أيامه
و أمته به كانت لباب السما ممتنّه
حالمٍ ما كانت لنفسه جميع أحلامه
وش خذا منّا .. و حنّا وش خذينا منّه
كم عنى للتايه اللي ما اهتدى لإسلامه
كم ترك بالخلف قنطار الذهب له رنّه
كم جلس يقرا نفوس العالم اللوامّه
كم وقف للمستغيث اللي كبر به ظنّه
مرّةٍ شفته و شفت قلوبنا قدّامه
كل ما افتى عوّد الجني لماكر جنّه
ما حلا حتى اعتدال الشيخ في هندامه
يوم يقبل .. عطر يجهر به و عطر يكنّه
زعفرانٍ باذخٍ في مشلحٍ و عمامه
كنّه أطهر صبح و إلا ما أعرف وش كنّه ؟
الموادع شين .. و الشامخ قصير القامه
بشّروه بعشرةٍ قد بشّروا بالجنّه

**********
أحمد ياسين

يا حلاوة صرختك والحر تكفيه الاشاره
ما انت في غزة وحيد .. إلا معك عشرين دوله
يا نهار كل ماله يسقي الليل المراره
ما عليك من الفوازير ، الفوازير محلوله
البطل ياشيخ ياسين ان شكى التاريخ عاره
قوّم الدنيا و طّش بها وراه وقال قوله
والبطوله تاره تشرق ضحى وتغيب تاره
يابطل علمتنا كيف ابجديات البطوله
انت لا من قلت : لا صديت لك خمسين غاره
وانت لا قلت : ايه تشحن لك مية صوله وجوله
كل وسم بجلدك والصوان طير له شراره
ياشموخ تنحني له هامه الدنيا خجوله
وان حنت ظهرك كرابيج تعز اسخف حضاره
ما تذلك و انت شيخ ممتلي دين و رجوله
بس حدثني حديث الما لعشاق الطهاره
عن بلاد صار للجغرافيا فيها الف صوله
عن صمود مخيمات تنشد الفزعه زياره
عن رجال لا خضوع ولا نفاق ولا عموله
عن جراد سبب الرعب اسمه ( اطفال الحجاره )
القدر بالحرب عوضهم مراجيح الطفوله
عن ( عروس ) فجرت عشرينها لعيون حاره
و ذكروا سكانها ايام من الخنسا وخوله
عن هذيك القبه آخر حلمنا واول مناره
بيلسان عزة الله و احتضن مسرى رسوله
عن حماس الرايح اللي كل ما ذعذع سماره
لان وجه القاع و اهتز البحر عرضه و طوله
عن زغاريد البنادق .. هي تظاهر بالغزاره
عن عصافير البادر هي تحلق بالسهوله
عن شبابيك اليد اللي حرمت لمس الستاره
عن رغيف من صباح الله قليل اللي ينوله
عن سما الموال و ارض الدبكه ورقص العباره
و التفاصيل الكثير وخطوة الذهن العجوله
عن يسر مدري عسر مدري كسر مدري جباره
هدنه لعيون عيد ما درينا عن حلوله
جيلنا مل الجرايد ما لقى فيها بشاره
و اكثر الأجراس خرسا والزمن هذي فعوله
ما وعينا إلا على النكسه وموال الخساره
نحسب اللي وسط بال اجدادنا نقدر نطوله
يا حرام .. الحر .. اجل ما عاد تكفيه الاشاره
وش ورا خمسين عام بعثرت عشرين دوله


**********

غازي

الأبيات تحبي لك..والثنا يمشي على معكاز
والأرض تدور..والمهجر يذكرني بمركازي
مكان في زمان عز بك..مااغلاه من مركاز
وأنا في مجلس نهجه ونهج العز متوازي
صغير..كل ماصدت عيون..اقرب من المعتاز
سواليف الضيوف تدور وعيوني لمعتازي
الا ياكثر اصابعهم إلى شافوك في التلفاز
وعشق مثل زخات المطر مجنون وإعجازي
افكر من يكون اللي على أصوات الضماير حاز
من اللي مايبي غير الجزا من رب يجازي
من اللي في فراش الموت ابوي يردده بإيجاز
من اللي يفرشون لسيرته سجاد شيرازي
تخيلتك شبيه السندباد..اثرك شبيه الباز
دخلت الذاكره والقلب يا اول واصعب ألغازي
ياغازي..والله انها ماتضيق إلا على المعتاز
وانا وأمثالي من الناس محتاجين كم غازي
عرفتك..مزن يزلزل زمان كله استفزاز
ولوما للزمن زلزال زادت نزوة النازي
قريتك..يوم خليت الورق باحلى الغرق يمتاز
يفزع له مية فارس..وتحتضنه مية جازي
سمعتك..يوم صحت وقمت اباري صيحتك منحاز
وأردد:نجد نجدي والحجاز.وربي.حجازي
اعزك ياعزيز عزك الله وانت بين عزاز
معزه من زعامة عزمها مدري وش توازي
تفاصيلك..غزت سجادتي..واصبح دعاي اجواز
محاصيلك..ملت زوادتي..وانجازك أنجازي
من اول مايجوز الغزو..قلت يجوز..قالوا جاز
كم أرض ترتجيه ان كان شروى غازي الغازي
يخلدك الزمن..ياصورة غرد بها البرواز
مثل ماخلد التاريخ ابن حيان والرازي
بعيد من المواجع وانحياز اليعربي لا انحاز
اب..اقول لعدويني قبل ما اقول لعزازي:
أنا من أمة في الماضي لها صهللة وانجاز
وأنا من أمة في تالي الوقت أنجبت غازي


**********

النسا

النسا روح المسا

والليل لو فكر يبات

كان ما فيه أغنيات

وكان ماله ذكريات

وكان ما فينا عظيم

ومال أمانينا حليف

وما بنا قلب وليف

ولا لنا قصد شريف

النسا نصف الحياة

الا النسا كل الحياة

آه يا أسرار الخوات

آه يا أحلام البنات

آه يا الطيش الطفولي

آه يالحسن الشفيف آه يالعشق العفيف

آه يالجنس اللطيف

علّمن حتى المرايا والشبابيك اللغات

والرسايل والدواة

صارت أعذب مفردات

كم بكن وانكف مبصر واضحكن وابصر كفيف

ورمشن واهتز سيف

وهمسن وامتد ريف

كم غدن لاخوانهن عزوة صناديدٍ عصاة

بين صفق المرهفات

وبين ضبح العاديات

طاحت أشناب وكراسي وانطلق دمع ونزيف

واعتلا الخف المنيف

والمقابر تستضيف

النسا ضلعٍ عوج لولاه كل العدل مات

مالهن عنا فوات

ومالنا عنهن غناة

تبرق الدنيا على يديهن ويغرينا القنيف

نطمع بتكريم ضيف

وناقف بيوم عصيف

النسا بحر على موجه منايا وأمنيات

والنسا مركب نجاة

نسأل الله الثبات

هن لباس وهن فراش وهن معاش وهن رغيف

إن فتك جوعٍ مخيف

وإن حدا الرجال حيف

النسا حتى شراب الجنه العذب الفرات

تحت ماطى الأمهات

يالهن من مكرمات

كل ما عود بنا الكد أقبل ابن آدم ضعيف

له ورا البيبان طيف

مثل نسناس المصيف

في بلادي يحسبون ان النسا متخلفات

في الضحى مستعمرات

وفي المسا مستوطنات

ما دروا عن هالبيارق شمخ العرض النظيف

فزعة الدين الحنيف

شجرة العز الكثيف

غادة وسجادة وكفين وحجاب وصلاة

من صبايا محصنات

من عروقٍ طيبات

أطهر من ألفين منظر كلها فتنة وزيف

في رجا الصبح الكسيف

واجرة الليل السخيف

كم مكانٍ يعرض أعراض آنسات وسيدات

والهوى له بايعات

والغلاف وله فتات

والحسن تشبير عنق وطولٍ وخصرٍ نحيف

وشي ما ينشاف شيف

لاجل الأول والوصيف

شهب تشابه رسوم الشاشة المتحركات

مال زمتهن طرات

و لا لهن ملح وحلاة

لا ربيع فيه خير ولا به الا بروق صيف

والشتا ما به رفيف

يحيي أوراق الخريف

لي مناحل لي خلايا كلها سكر نبات

لي حصونٍ ناعمات

لي غصون شامخات

لي قوارير ملاها العقل والدم الخفيف

خلفها العمر الكليف

ودونها الحد الرهيف

يا زمن وش جاب حلوى غلفوها بالعباة

جنب حلوى للمشاة وللغبار وللشتات

شف بدل ما هي لواحد صارت لجمعٍ لفيف

كيف أنا اخبرك كيف

شوفها فوق الرصيف

********
الغربة

يمه ..الغربة وفرقاك ملتمه
دمعة العين هذي ... مالها داعي
يابعد راسي انتي ليه مهتمه
الوجع لي سواة الناي للراعي
آخر أخباري ... الذمه هي الذمه
والوصايا هذيك تقدي شراعي
مابه الا السواد يحاود اليمه
ولا به الا البياض اللي ورا أضلاعي
وأشعل ما يفارق ليل حضن امه
وأخضر كل صبح من أول أتباعي
يتعب البرق ما أتعب النظر يمه
وانشديهن بعد ما قلت أطماعي
أنجبن لي عروسة حلم أضمه
أو بعد توها تشرب عطش قاعي
واذكري كيف كان العود ابو عمه
ايتعلى صهيله وأرخي أسماعي
امنياتي بدرب ودي أتمه
آخره صعب .. وأصعب منه مرجاعي
يوم كلن فزع له خاله وعمه
يكفي اني وردت العد .. بذراعي
أرفع الراس بين الروس ما همه
وأتباهى وأنا الغرقان بأوجاعي
يمه.. الحر طبعه يعشق القمة
وأنتي اللي فطمتيني على أطباعي
الهواء دام راسي حي ويشمه
والله اني لاسوق هناك ذعذاعي
غربة تلوي ذراع أشجع الخمه
لا تخافينها لو تقلب أوضاعي
يمكن تبعثر الرجال وتلمه
بس !! بدري عليها تلوي ذراعي

**********

فضفضت لي

فضفضت لي عن سواليف امها اللي كدرتها
والحزن مثل الحسن لامر لازم ينوقف له
جت تفلسف طفلةٍ مكياجها من فلسفتها
كملت عشرين عام ولاتزال اليوم طفله
يشبع الخلخال والسلسال جايع برقبتها
خيزران لينها بين انتباه وبين غفله
ودي ادري لامشت بشعور الارض اللي تحتها
وانتثنت قلت وين اللي يقول ان الترف له
اه لولا خصرها قلت اسرفو في تغديتها
ما افقره بين النعيم ولايبي من ينتصف له
حاجةٍ تطري عليها جايبتها جايبتها
نسمةٍ ماتعترف بالباب والحارس وقفله
قلت وش ذا اللي خفق بين الضلوع امن اولتها
قبل اقول الضيف جاك اثره فتح كل الغرف له
يوم قدمته لها ليلة سرتبي سلهمتها
قالت اتشرف بقلبك يافتى قلت الشرف له
طرت مع سرب الحمام اللي سرى من حنجرتها
ساعتين وهي تسوق الرمش وابصم واعترف له
تجدل انفاسي واللى حست دفاها كسرتها
وطلقتها للهبوب بكل طيشٍ تنجرف له
لين باخر طيشها قصيت اظافر شيطنتها
لاتشح بكيدها اللي كيدها ابن ادم ضعف له
نسنست عصرية الجمعه وهي تقرا بختها
بين جمع من العذارى كل شي منكشف له
كل ماجن يمشطن شرطانها اللي تعبتها
سمعوها من قصايد خلها اخر ما اتعرف له
ولدت الحلمٍ تدورله وتنشد منظرتها
لدت البرواز اسود دمعها ياماذرف له
لدت توصي مكاتيب قبل مازرفتها
ضمنتها الغاليه دمعه وداع وعطر حفله
قلت ارضيها وجيت وجات والدنيا ملتها
والغزل دار ولقى المشتاق مشتاق يعزف له
كل مازودت وردي السواليف اخلجتها
وكل مازاد الحيا قلت الحلو وش ينكسف له
قالت امي تفتكرني طفله وتظلم بختها
صح انا ماني بطفله صح انا ماني بطفله

**********

رسالة إلى الجيل القادم

يعني ماغير الجندي اللي هزه الشوق ورمى
غنا على نغمات(ياعصفور وينك مختبي))
قناص ابن قناص..قتل النفس عنده شرب ما
مادم قنص الصادمين الذ من قنص الظبي
يعني ماغير الطفل ذاك اللي ورا ابوه احتمى
كم نعش ملفوف بالبيرق وباطراف العبي
ما احنا لنا خمسين عام نفكر نصون الحمى
كن العروبه في دم المستعربين أي اجنبي
حنا ولفنا هالرصاص اللي بالاحضان ارتمى
عقب الحمام اللي ولفنا في سما مسرى النبي
حنا على بير السلام اللي ذبحنا بالظما
كل اغبيانا يحلفون ان الزمن هذا غبي
داوود هذي نجمته تخطب عشاشيق خصما
لو كان يحرقها مية مليون مخلص يعربي
كم غير الشاشة بعد ما مل من شوف الدما
متبلد..قال ايش..قال اهتز من موتة صبي
عقول يا مال الغبا..وعيون يا مال العمى
وازوال يا مال المرض..واموال يا مال السبي
الله يا حلم نلوكه كثر ما العايل زما
ماقوم الدوله وخلا الحلم يولد ويحبي
الا دلال المغربي يوم ارخصت غصن نمى
يا هل العزاوي مادريتوا من دلال المغربي
هذي شجرة ثابته وفروعها وسط السما
قالت قبل توديعنا:يا ارضي من الروح اشربي
يالله ما دام أمال اهلنا فوق طاولة زعما
نك تقدينا الصراط اللي نبي
وان كان طالت والعصافير اسرف بها اللي رمى
يالله بجيل كله يشابه دلال المغربي


**********

(سوار الذهب)

يالفارس اللي ترجّلت و حضنك الهدب
يا ليتك أبطيت و الدنيا عليها السلام
يوم اعتنق معصم الأمه سوار الذهب
طاب التلاقي و لا أحلى منه غير الخصام
ثرت و بدل ما يسيل الدم لين الركب
اوميت بالغصن حتى جاك سرب الحمام
همنا بموّالك اللي مثل صوت القصب
يا عاجل البر و الخيره و مسك الختام
الله على فعلك أثره مثل حد الحدب
و الله على الكرسي أثره مثل بنت الحرام
أحدٍ على أخوه و أحدٍ ضد أبوه انقلب
ترسم و تحسم خرايط تحت جنح الظلام
و أحدٍ رهين اتجاه الريح مع من غلب
و أحدٍ على طول خلف خلاف .. ليته عدام
ما يعجبه لا العجب و لا الصيام برجب
كان أسفل السافلين و فجأه أعلى السنام
و اللي انولد وسط فمّه ملعقة من ذهب
الرّب ساتر عيوبه من سنين الفطام
بس انت غير و فعولك غير .. ياللعجب
من يأسنا في الحلال نظن فعلك حرام
خطابة العرش مرّوا في زحام و صخب
يا أشد أهمية من أهل الصخب و الزحام
يا أكبر فخامة و أقوّ عزوم و أعلى رتب
و أطلق زعامة و أعز جنودوأطهر نظام
لا فاخروا بالدراهم و الحسب و النسب
فاخر بشيٍ عجز عنه الملوك العظام
معاويه و انت عيدين بحياة العرب
و احنا جسد و انتم الاثنين تاج و وسام
قالوا زمام أمة محمد عساه انقضب
قلت الله يخلي خشوم النسا للزمام
في شرقنا تنقص الثورة و حجم الغضب
و يزيد رقم النصايب جنب رقم الخيام
فخامة الرّيس أعيانا الرجا و التعب
حتى أصغر أحلامنا ماهي على ما يرام
فخامة الرّيس آخر شي عندي طلب
تسمع من اللي فتح لك قلبه آخر كلام
لو فيه عشرين حاكم من سوار الذهب
ما كان قلنا عروبتنا عليها السلام
**********

العروس

وية درب عمري ماخذاني دونها النسيان
وأنا يا اهل الملامه ما رغبت العيش وحداني
ابي لي مهره ماعسفت صغيره وبنت حصان
ابوها اللي يفك المشكله ويزبن الجاني
واخوها لا تعزوى باسمها فزوا لها العربان
يحق لها الفخر في قولة آل فلان جداني
أبيها في بحر عشرين لا زود ولا نقصان
أبيها اقصر طويلة والوصوف اشكال والواني
أبي الجبهه كما الصبح وكما القوس اسود الحجان
وابيها ناعسات ونرجسيه سود الاعياني
ابي رمش كما ريش يغطي الثلج فالاوجان
وابي جفن يشيل الرمش طربان وكسلاني
ابي خد كما ورد تنّمى في طرف بستان
وابي خشم صغير ومثل حد السيف شاماني
ابي البسمه كما البرق وثناياها كما المرجان
شفاها جمرتين وفمها خاتم سليماني
ابي شعر مثل ذيل الفرس لا طبّت الميدان
او الشلال لامن بات ليله بين الامتاني
ابي جيد سوات ابريق فضه ناتق مليان
وصدر كنه مرايه عليها طلع رماني
ابي ظهر كما الجدول وقدّ مثل غصن البان
وخصر مثل مجدول الاعلان وجسم روياني
ابيها نابية ردف وبطن ظامر جوعان
ابيها مدمج ساق وقدمها لسان ثعباني
ابيها بنت عز من رغدها ينعم الفستان
ابي الرقه وابي الدقه لها باطرافها شاني
ابي المشيه كما اللي طالع من المعركه كسبان
وابيها ترش مع خطواتها مسك وريحاني
ابي صوت الى مني سمعته كن فيه الحان
يدغدغ مسمعي ويثير كل السحر فاشجاني
ابيها حب واخلاص وهواجيس وفرح واحزان
ابيها مثل ما دكتور اهالي العشق وصاني
ابيها لوحة ما صورتها ريشة الفنان
ابيها جوهره ما جابها قاصي ولا داني
ابيها تنتصر لي من زمان حطني نيشان
وتبشر بالغلا اللي مالفى به واحد ثاني
مهرها قلب وشعر يهز القلب والوجدان
وألبسها القصيد وتصبح اوزاني وقيفاني
ابي اللي فات واللي فات صعب ومن لقى العنوان
يرد العلم ولا افضل ابقى اعيش وحداني

********

شمّر

الشمس غابت وكل ٍ دوّر سراجه
والشوق جمّر محرّ الشوق لاجمّر
دام اتجاهك شمال مودعك حاجه
سلّم على حايل وسلّم على شمّر
قدامك الخافق اللي ينشد علاجه
كنه معلّق على برزان ومسمّر
وانت تعرف يا بعد حيي من تواجه
بيضان الافعال لامن الزمن سمّر
ان ضاقوا أعنف من البحر وامواجه
وان راقو اركد من الخرمان لا عمّر
كم صيت بيت ٍ عتق في الباب مزالجه
وكم شيخ اماره قبل تعيينه مومر
وكم حاتمي ٍ تكفيّ فلّة احجاجه
وش لون للضيف لو عن ساعده شمّر ؟
وان مر تاريخهم متلبس ٍ تاجه
كم عاشق ٍ كيّف وكم حاسد ٍ زمّر
في جو ٍ اغلى على الرجلي الى داجه
من ديرة السادس ومن ديرة معمّر
كنّه الا اهدى له البراق فجاجه
خلت غرير ٍ ضحك ومن الخجل حمّر
توارثو حرثه وتمتير ديباجه
ركابة الجيب من ركابة الضمّر
الودّ لا غرس بدري صعب مخراجه
والله ولا الذّ واحلى منه لا ثمّر
ادخل على اللي تطوف البيت حجاجه
من ناقص ٍ عند مدح الغير يتذمّر
والمدح لو كان في الرديان للصاجه
ويقال عمّر بلد بالعون ما عمّر
والذّم لو زاد في الطيب تولاجه
لا احرق ولا اغرق ولا عمّر ولا دمّر
ماني بمتحسب بشعري على حاجه
الا اني اروح ما غنيت في شمّر


*********
(ارهابي)

نحمد اللي بيّن الحقد الدفين الغابي
و أعتق أقنعة الوجيه اللي تقاربناها
أول المكروه سلبي و آخرته إيجابي
خير الأرض القبله و خير الدروس أقساها
يوم وصلت للحمى ما أرخص من العنابي
من يعيش بدون مذهب .. عيشته ينعاها
جدّي اعرابي و أنا اعرابي و ابوي اعرابي
و أقرب مصيبه على الأعراب قرب حماها
كثّروا فيك الحكي يالمسلك الوهّابي
كلمّا زمزم شربنا شربةٍ من ماها
يزعمون إنك تصدّر كل يوم إرهابي
الله يكرّم مشايخنا و طيب لحاها
لدّوا أهل الموبقات السبع وسط كتابي
و طلبوا من بيّناته كلمتين انساها
ساقوا أصحابي هناك و شككّوا بأحبابي
و أوصوا بتقطيع جسم أمٍ توارثناها
و أنكروا في بنت عمّي حفظها جلبابي
يحسبون المحصنات تهيم في دنياها
و طار في عجّتهم الوجه الكريه الهابي
ما يغت من الدبش عز الله إلا أرداها
و الكروش أربابها وسط البنوك ترابي
و العروش أكثر قضيّه ماخذه مجراها
و الخرايط تصغر أكثر مثل صغر ثيابي
ايه ما كن الفجوج الجرد مترّناها
يا وجودي كل ما صليّت في محرابي
و افتكرت أمّه حميد و حلمها و أقصاها
وجد عودٍ مرّ بالشارع و هو متصابي
و لا درى إلا و العماير معطيته أعلاها
إن نجا قالوا عليه الظالمين إرهابي
و إن رحل معلوم حنّا اللي تحمّلناها

********
أهل الأذكار



أهل الأذكار تدعي والظلام انتحى
والدعاوي تهز مشيدات القصور
والخطاوي تعثر بين خوف وسحا
والفتن تشتعل.. وانتم سواة البدور
دارت الارض بالعالم ودار الرحا
وانتم الشامخين وما تبقى يدور
كل ما المح شموس وجيهكم في الضحى
احمد اللي بعيني زود النور نور
في الجباه السمار اللي ظهر ما انمحى
ابشروا به وهو يشفع بيوم النشور
السنتكم عطاها الله حديث فصحا
وافئدتكم من الايمان تنضح سرور
قصر المسك يا حمالته واستحى
يوم جاء يعطي اعطيتوه طيب وطهور
يا تلاميذ عقد الصفوه اللي نحى
يا حبايب صلاة الفجر واهل السحور
يا رجال على يديكم صحى من صحى
سعد روح تغذت من بصيرة غيور
انتم لمعشر السالين خير نصحا
وانتم لنصرة الدين اصدق اللي يثور
ان دخل صفكم وجه كذب والتحى
رده اللي يرد الكيد وسط النحور
وان هرج زيد لعبيد بسوالف جحا
لا لحقكم شكوك ولا لحقنا نفور
واللي انزل تبارك والقلم والضحى
انكم هدينا عن محدثات الامور
واصلوا يا بركتنا دون خوف وسحا
ردوا نفوسنا اللوامه من القصور

*********

بغداد


عساها فاتحة برد وسلام وخاتمة و قَّاد
على دار السلام الله يروّع من بروّعها
حضارة سومر وبابل قبل تشريفة الميلاد
عروق الرسل والعلم واهل الشعر وروايعها
هوى سيف الله المسلول يوم السيوف حداد
مساري سربة ٍ كان المثنى في طلايعها
عروس ٍ زفها المنصور والدنيا لها سجاد
ودلعها الرشيد الله عليها يوم دلعها
بدت بالسندس اللي يهوس الخلان والحساد
وكثر ماهزها التاريخ ما اهتزت مرابعها
بقت خضر ٍ مرابعها بقت تنجب لنا أمجاد
بقت بيض ٍ صنايعها بقت سود ٍ وقايعها
ورى ما تستميت اقلوبنا معها وهي بغداد
ياكبر العار لو ما تستميت قلوبنا معها
عليها الله وامان الله الى ذرات زين ابلاد
هجد صوت القنابل جنب تهليلة جوامعها
دهاها من ورى الحملات ليل ٍ لو نقص يزداد
أهلنا في مدامعها واهلها في مطامعها
هل الحرية اللي لا غشى اصحاب البيوت ارقاد
تفرق بينها من دوية الهاون مضاجعها
هل الحرية اللي بعدها صاروا بنات الضاد
ينوش المعتدي حشمة ملابسهن ويرفعها
هل الحرية اللي قصت أجنحة أكثر الأولاد
مادام ايدينها ماترفع اثنين ٍ من أصابعها
تعودنا على حرق النسل والحرث والأصفاد
تعودنا على نار ٍ يطفيها مولعها
يبس بكفوفها إلا غصن زيتون ٍ وكما المعتاد
عناقيد الهدايا جاتنا من كف صانعها
عسى المقبل مثل صيحة ثمود ومثل صرصر عاد
عشان أهل البيوت الخاربه تبرى مواجعها
ألا وين المراكب سايره في حضرة الرواد ؟
عساهم للدواير لين تدرجهم منافعها
مصير امصار و اجيال وزمن وجموع بيد افراد
لها التاريخ بالمرصاد وان خانت ودايعها
محبتنا عداوه والقلوب قريبّات بعاد
بعد ما نصنع الكذبه نصدقها ونتبعها
خذتنا العنتريات الله يبيح من ابن شداد
وضعنا بالخطب ليت الخطب نقدر نضيعها
تواعدنا مع الوحدة وصرنا نخلف الميعاد
مذاهب وانظمه واحزاب من يقدر يجمِّعها
تصهْيَنْ دم ناس ٍ طايرين بعجة الأوغاد
تصاغرنا مثل ماستصغر الكرسي مراجعها
أخيرا : كم بقى طاغي وكم باغي وكم جلاد؟
وكم لص وكم أصنام وكم أوهام ٍ نصارعها؟
وكم صورة تظن الروح والدم أغنيه وانشاد؟
وهي كل ٍ هناك يدوسها والا يقطّعها
لعل الليله اللي جابت الكابوس ماتنعاد
وبسم الله على بغداد من شي ٍّ يروّعها

***************
(يمه)

يمّه اذنبت و نزحت من العشيره
و ان تمنّوا توبتي ماني بتايب
مابي لدنيا الغنادير اي سيره
طايح ٍ من عام الاول في مصايب
يمّه .. اللي حب له طفله صغيره
وش يسوّي لا غدى فيها طلايب
طفلة ما كانت بحبي جديره
بس كانت غير عن كل الحبايب
كنت اسميها العنود المستذيره
ليت اهلها العام سمّوها عجايب
كنت اجيها مثل الامطار الغزيره
كنت اضيع بجوّها مثل الهبايب
و اطلب الله هي متى تصبح كبيره
تفهم شلون المكان يصير ذايب
ان تغنّت صارت الطرقه قصيره
و ان تغلّت صارت جروحي عطايب
و ان بكت ناش الفضاء طهر الستيره
و ان شكت راح الحكي مثل الذهايب
و ان توارت مثل الاسرار الخطيره
صار لوني مثل الايام العصايب
ديرة ٍ ماهي بها ماهي بديره
لو ثراها عشب و اعلاها سحايب
يمّه .. تحبين .. طايلة الظفيره
آه .. والله يا عليها اشقر ذوايب
ان تحرك له سواليف ٍ كثيره
و ان ركد روّح مثل لمّة قرايب
عرّفتني الليل و نجوم الظهيره
بللتني بأغنيات و رحت طايب
كل عرق ٍ في خفوقي تستثيره
خايف ٍ تصبح مراجيحه نصايب
صنتها مثل البحر لأبعد جزيره
ما تركت علومها لأهل الركايب
قالت : ان جاء الراس شايب فيه خيره
قلت : يا بنت الحلال الراس شايب
قالت : الا الحب وش هو ؟ وش مصيره ؟
قلت : انا استاهل و انا كل السبايب
ما جزا اللي حب له طفله صغيره
غير قبر .. و ضحكها فوقه نصايب

*************

جبل طارق


البيرق اللي على قمة جبل طارق
عارٍ حنى الهامه اللي طال عاتقها
جيت أسأله يوم شفته بالحزن غارق
وأقول شف حابس العبرات مطلقها
ما بين مغرب رضاك وغيظك الشارق
ذكرتني حصة التاريخ ما أصدقها
ما كنّك اللي مرق من جانبك مارق
للوادي اللي فلول الذل فرقها
من طيب حظك ومن تفكيره الخارق
ساق المناوي وقال الله يحققها
ما تذكره يوم مر الماء كما الزارق
لميت جنده ولم السفن وأحرقها
ما تذكر الخطبة اللي سرت البارق
والخيل والريح والعزه و بيرقها
ما تذكر الغاده اللي غصنها وارق
من سربه الحق ترجي ثار خافقها
ما تذكر الفرقتين وشاسع الفارق
والسبع الأيام ما تذكر دقايقها
الموت مثل الحياه أطماع ومرازق
والأندلس تنتظر ميعاد عاشقها
بوابةٍ قبل ما تنشد من الطارق
هبايب المسك ساقت ريح طارقها
لين ارجهنت وغنّا شوقها الحارق
من أول أبراجها لآخر حدايقها
يا أغلى المراقيب . . أنا رحال ومفارق
والكلمة اللي تزيد الهم أبنطقها
طارق وروح . . تصبر يا جبل طارق
لو رزت القوم في راسك بيارقها

**********

(قصر الحمرا)

على الحمرا السلام و كل حيٍ يذكر أمجاده
و أنا تاريخي أمجاد و براهيني مجوّدها
قصيدة شعرنا الشعبي عروس بتاج و قلاده
سفيرة لهجةٍ طلّت على الدنيا قصايدها
على البال ابن زيدون و غراميات ولاّده
و سواليفٍ لابن رشد أتذكّرها و أرددّها
يا هالقصر العظيم اللي هل التصوير ترتاده
يا تحفةٍ غير أهلها مستحيل أحدٍ يشيّدها
يا تنهيد العجوز و ضحكة المولود بمهاده
يا نفحه عاطره لبنيةٍ ما زمّ ناهدها
يا جرحٍ ما على بال الزمان المقفي ضماده
لفيتك و انت بأرضٍ من غلاها ما اتباعدها
على الروضه وقفت و وقفتي ماهي على العاده
ومن باب الشريعه ساحه الريحان قاصدها
مشيت و جيت في بهو الأسود أتذّكر الساده
و ألبّي صوت جنّات العريف اللي مواعدها
الأبراج .. الدهاليز .. الحصون .. السقف و عماده
حجا الجدران .. نقش أقواسها .. مرمر قلايدها
خرير الماء على الحوض الله الله ما أعذب انشاده
صور عشر الرجال تقرّب السجه و تبعدها
أجي ديوان ابو الحجاج مابه غير مقعاده
و لا حصّلت لك من حاشيته إلا مساندها
مليت الكف بترابٍ شرد ذهني مع أسياده
و تلّت دمعتي تنهيدةٍ كنت أتنهّدها
أنا أدري بك حزينٍ يعربّي طوّل حداده
على خير أمةٍ صفحاتها بيضٍ تساودها
و انا ما جيت سايح جيتك بمصحف و سجاده
من حجاز أكرم الأكرام و أشرفها و سيّدها
أنا المتغرّب اللي نادته قطعه من بلاده
صويبٍ شاقته حمر القصور و جاء يشاهدها
صوابه فيه من غرناطه و فيها من أجداده
رجالٍ كل واحد قوّم الدنيا و قعّدها
رجالٍ جغرفوا شعث الفجوج و جات منقاده
رجالٍ غيّروا تاريخ الأمصار و عقايدها
رجالٍ ما أشغلتهم عن مناويهم و لا غاده
و لا حتى قصورٍ ماسها يحضن زبرجدها
خذوها من هنا حتى ورا النهرين و زياده
و ساقوا عقربيّات صهيل الخيل راعدها
زمنهم كان صعب و كانت الأرقاب سدّاده
و الانفس تنجلب و الحدب تلقى من يجرّدها
لك الله كانت الدنيا لهم ساحات و رياده
متى نتبع خطاويهم و كلمتنا نوحدّها
متى بس نتصافى و السحاب يدّن رعادّه
متى أحلام الربيع المبتعد نقدر نجسّدها
متى .. مدري متى .. لكن مصير الحق نعتاده
ما دام جباهنا ما فارقت روضة مساجدها

*******

همس الغمام

قلت:من ذيك الصبيه قالوا:من احلى الصبايا
قلت اقول الله يخليها لعين ترتجيها
طلة ما استوعبتها لا العيون ولا المرايا
كم تعدتني وانا ما كنت والله مهتويها
مادريت الا وهي مثل النفس بين الحنايا
ان شهقت اموت منها وان زفرت اموت فيها
اثرها يوم اني اجمع مابقى لي من بقايا
عشعشت في بالي المحروسه اسم الله عليها
طفلة قدامها طفل سرق همس الشفايا
كل همه كلمة ما كل الافواه تحكيها
كنها في ضحكها عيد وزغاريد وهدايا
كنها في حزنها عين خورها مكتسيها
بانها اللي فارد طوله مسوي بي سوايا
وارتشافة قهوة انفاس تعودت احتسيها
نهر حسن ضفته ستر وتواريخه عرايا
صب ف عروقي وقامت ترتويه ويرتويها
عندل بفراقها تكشيرة انياب المنايا
كيف ما ابيع النفيس وضحكة العمر اشتريها
حاولت لحظه من اللحظات تنثرني ضحايا
كنها اللي تنتصر لجروح حواء وتحميها
والخفوق اللي رميته بينها وبين الخطايا
تشتهي جرحه وهو في عز جرحه يشتهيها
كم بدت طفله تحب احلى القصص واحلى الحكايا
قلت أمر اشكي عليها الهم واصبحت اشتكيها
كم على الماء والذهب والرمل والبيض الضمايا
إنقشت قلب وسهم وحروف حب تحتويها
كم قرت شعري ولدت للمرايه والزوايا
الجديل تبعثره واحلى الملابس ترتديها
وش ورا همس الغمام ان قلت يا شح العطايا
كل شيء من ملامحها يجيني قبل اجيها
ما ذبح تفاح انوثتها مغاتير النوايا
من قصد قصده شريف ومن ورد ماها يبيها
علموها بس ! والا علموا كل البرايا
انها اللي عود امري من يديني في يديها
والله ان تبطي وهي تختال من بين الحنايا
مره تسمي علي ومره اسمي عليها










إضغط على الصورة لمشاهدة الحجم الكامل
أماكن التوزيع